merre me leng se mishi u mbarua

Se ç’më sollën një fustan

Të bukur që aman aman

Pa ç’më rrinte krëk në trup

Çupë për t’u pirë në kupë

Dukesha (ajo që jeshë)

Bojalleshë dhe sojlleshë

E bukur ndalu më mua

Misi s’më vinte as në thua

E vesha te dasma e Lejlasë

Se kishte kushërinjtë nga jashtë

Keshnë ardhur nga Gjermania,

Amerika dhe Greqia

Kërkonin nuse të mira

Punëtore dhe të dlira

Pa të bukura pa të reja

Të ëmbla si reshedija

Thoshin që fëmrat andej

Qenë nursëze e jo terbije

E nuk bënin hiç për nuse

S’qenë rritur me ujë pusi

Argaliseshin ditë e natë

Burrave u prishnin paratë

E kështu vajta në dasmë

Sytë poshtë e llërët jashtë

Mi nguli sytë amerikani

Që te porta i krisi xhani

Nuk se ishte yll me bisht

Dhe dhëmbët të vënë i kish

Po dhe i keq fare s’qe

Edhe kishte mall e gjë

Ashtu si thoshte Lejlaja

E kishin zili dynjaja

Vetëm shqip fliste çalë-çalë

Sikur përtypte një kile zall

Greku veshur tërë kuturë-

-hëm dantellë, hëm lëkurë-

vetull trashë e sy-bardhë

duart si brumë i ardhur

më premtoi fushë e male

pa c’kërcente edhe valle

Gjermani pa llafe shumë

Seç më fliste për ca punë

Ca biznese dhe ca plane

Prishur nga bota nallane

Që nuk ndreqej më kurrë

Burrin s’e linte të ish burrë

Fshati ynë veç qe mënjanë

I paprishur anë e mbanë

Sa i paqmë sa i qetë

Një parajsë e vërtetë

Vashat ishin si sorkadhe

Kokulur, e punë madhe

Vura buzën pak në gaz

Edhe ika gjithë maraz

Ç’më vajti fustani kot

Gjithë trushkulur kjo botë

Nga i fundit tek i pari

Jo, nuk i gjendet karari

Çoban, të marrsha të keqen tynë

N’daç për qejf e n’daç për punë

Buza të rri vetëm në gaz

Kënga të ndjek nga pas

Ashtu dhe unë si manare

Ja të marr, ja vdiqa fare.